خاص :Checknotes من الطفلة نايا إلى الله: ما إلك طلب منك إلا تاخدلي حقي!

إسمي نايا حنا.. عمري 7 سنين.. عم خبّرك يا الله إنو حتى يفرحوا قتلوني.. لينبسطوا غدروني.. رصاصة طايشة سرقت عمري.. وخلّت الورد اللي بعده زرار يدبل وما يتفتّح..

بكرا بيوم الدين ما إلك طلب منك إلا تاخدلي حقي.. أنا مظلومة بهالدنيا.. غريمي مين؟!.. حقي وين؟!.. الدولة سايبة والسلاح فلتان.. النتيجة عمري انتهى قبل ما يبتدي.. انا ليه متت؟

عم خبّرك يا الله إنو بهالدنيا كفروا فيك.. وكل واحد افتكر بسلاحه صار رب الكون.. وببلدنا الغدر شغّال.. والسلاح على خصر الزعران صار كتير.. بس دموع أهلي  اكتر بكتير..

إنتَ بتعرف إني أنا انظلمت بدولة سايبة.. “كلن يعني كلن” من بعد موتي طالبوا يوم يومين بحقي.. وبعدين راحت على اللي راح.. وتلفلفت القضية ضد مجهول ورصاص طايش… وكلن نسيوني…!!