كن الأول
في معرفة آخر الأخبار والتحقيقات والمقابلات

إشترك الآن لمتابعة آخر المستجدات
على مدار الساعة

الواقع الوائع

لازانيا ... "لازانية" !

Sat,Aug 16, 2014

بعترف اني محدود جدا بثقافة الأكل الغربي، أو يمكن بالأكل بشكل عام، لدرجة انو كنت بس اسمع عن الـ "لازانيا"، فكر انها مواصفات لفتاة شريفة عفيفة بهيدا الزمن، اللي ما فيه اسم على مسمّى لا شريف ولا عفيف (ولا كل الأسماء الباقية). مرة قلّي احد الأصدقاء انو عم ياكل لازانيا، فكان جوابي العفوي "هيدا مصير البنت اللي منها زانية بهالزمن"!

مرقت أشهر وسنوات، واكتشفت انو اللازانيا اكلة ايطالية "بيموتوا فيها" اللبنانيي، متل ما بيموتوا بكل شي اجنبي. وبعترف اني حبيتها وصرت آكل منها باستمرار، واخذت معلومة جديدة عن عالم الأكل، وصار فيي اتصرف متل اللبنانيي اللي شايفين حالهن بـ "بريستيجهن " الإجتماعي لأنهن ببساطة بياكلوا أكل طيب، وأجنبي، مثل الـ "لازانيا".

اليوم صرت بس انعزم على اللازانيا بلبّي الدعوة بسرعة، بلا تردد وبلا ما انجبر اخلق اعذار. صارت بالنسبة لالي متل التبولة بتحاكي "وطنيتي". وماحدا بيعرف متل ما في ايطالي بيطلع متحدر من اصل لبناني، يمكن كمان تكون اللازانيا متحدرة من اصل لبناني، بس خوفي اذا كانت القصة مظبوطة يختلفوا حولها اللبنانيي: هل هيي من 14 ام من 8، ام يمكن تتطلع وسطية مثلا؟!

إلك كل تحياتي يا "لا زانية" (يا آدامية يا طاهرة)، يلي مش بايس تمك غير امك. إلك كل اشواقي لانو بحبك وكلنا منحبك، جيتينا من برا وحببتينا فيكي، وعلى لحظة راح تنسّينا التبولة والكبة النية.

 دايما كنا نقول الحق على الطّليان، بس اليوم منقول الحق مع الطليان لانو حبوكي وحببونا فيكي!

محمد جابر

POST A COMMENT