كن الأول
في معرفة آخر الأخبار والتحقيقات والمقابلات

إشترك الآن لمتابعة آخر المستجدات
على مدار الساعة

الواقع الوائع

حساب لبناني:1+ 1 = ؟؟؟

Wed,Apr 16, 2014

حساب لبناني:1+ 1 = ؟؟؟



محمد جابر


رغم إني فاشل بالرياضيات، وأعلى علامة أخذتها بحياتي كانت 2 من 20 (ويومها عملتلي المدرسة احتفال لأنو اول مرة بتخطى الصفر)، بس عن جد السياسة بلبنان حبّبتني بالرياضيات، وخلّتني شوي أفهمها، على قد ما في نظريات بتحكي عن الارقام.

ساعة عن "التلات تمانات"، وساعة "عشرتين وعشرة"، وساعة 9 -9 -12، وساعة التّلتين، وساعة التّلت المعطل، والنصّ + 1... وما ننسى إنو اللبناني إذا سألوا انت مع مين بجاوبهن برقم، 8 أو 14. يا الله ما ألذّنا نحن اللبنانيي.

كرمال هيك على كبر سخرت كتير من نفسي، ليش كنت إعجز عن حل المعادلات الحسابية، ليش كنت استسلم قدام نظريات علم الجبر، رغم اني من بيت جابر.. ليش ما كانت الزاوية والدائرة والمربع يعنولي شي.. بس لما كبرت شوي واستمتعت بالإنتظار بـ "دوائر" النفوس، ومشيت بالقرب من "المربع" الأمني قبل ما يدمرو العدو الإسرائيلي، وسمعت بـ "مثلث" برمودا، قلت بقلبي "أخ شو كنت غلطان يومها"!

الرياضيات عالطريقة اللبنانية كتير كتير سهلة.. وبالعالم العربي أسهل وأسهل.. يعني بكل بساطة 1+ 1 = قد ما بدو الزعيم! هوي بس ينقي رقم ونحنا تحت أمرو.. بس بلبنان أصعب شوي، لأنو في كذا زعيم على عدد الطوائف، وعلى الأرجح ما رح يتّفقوا اديش بساوي 1+ 1.. يمكن حدا منن يغلط ويقول 2، وساعتها رح تقوم القيامة عليه.. شي بقول 5 شي 10 شي 17 شي 170.. ورح يصيرو، يقضوها "دقّي وعصري"..

كرمال هَـ "العلم الحسابي" الرهيب،  راح ضل حب السياسة، بلكي بيجي يوم وباخد 20 على الرياضيات!

POST A COMMENT